Պլաստիկի հավաքագրմամբ և տեսակավորմամբ զբաղվող «Էկո աղբ» հասարակական կազմակերպութան նոր նախաձեռնությունը՝ Green shop 4eco-ն, ստեղծված է վերամշակված պլաստիկից իրեր գնելը խրախուսելու նպատակով:

ՀՀ կառավարության ֆեյսբուքյան էջում խանութի գործունեության մասին պատմող տեսանյութ է հրապարակվել:

«Թուղթը աղբ չէ» նախաձեռնության հեղինակ Հռիփսիմե Մկրտչյանը նշել է, որ «Կանաչ խանութից» հնարավոր է ձեռք բերել հայկական արտադրության կենցաղային իրեր՝ վերամշակված հումքից։ Ինքնարժեքին ավելացված գումարով նախաձեռնողները կփորձեն ծածկել թափոնների հավաքման ակցիաների ծախսերը։

«Երևանում շատ-շատ են վաճառվում, օրինակ, թուրքական ծաղկամաններ, սակայն արտադրվում է նաև հայկականը՝ վերամշակված պլաստիկից, որն ավելի մատչելի է։ Օրինակ՝ 17 լիտր տարողությամբ թուրքական ծաղկամանը վաճառվում է 1200 դրամով, իսկ հայկականը՝ 950 դրամով»,- ասել է նա՝ հավելելով, որ թերթից նաև գրիչներ են պատրաստում և վաճառվում:

Հռիփսիմե Մկրտչյանը նշել է, որ Հայաստանում վերամշակվում է գրեթե ամեն ինչ:

«Ունենք 5-6 գործարան, որտեղ վերամշակվում է պլաստիկը, նաև վերամշակված թղթից տոպրակներ են պատրաստվում»,-ասել է նա: