Իտալիայի կառավարությունը հնարավոր է հրաժարվի դեռևս նախորդ կառավարության կողմից Ֆրանսիայի հետ ձեռք բերված պայմանավորվածությունից Լեոնարդո դա Վինչիի (1452-1519) կտավներից Լուվրին տրամադրելու վերաբերյալ Փարիզում 2019թ-ին բացվող նկարչի մահվան 500-րդ տարելիցին նվիրված ցուցահանդեսում ներկայացնելու համար։ Այս մասին հայտնել է Իտալիայի մշակութային ժառանգության, մշակութային գործունեության և տուրիզմի փոխնախարար Լ. Բորգոնզոնին։

«Երբ ես հայտնաբերեցի համաձայնագիրը, մտածեցի.

«Սա նախորդ կառավարության ամենաամոթալի գործողություններից է մշակութային ժառանգության վերաբերյալ։ Ինչպե՞ս կարող էին իտալացիները համաձայնվել տրամադրել դա Վինչիի աշխատանքները և դրա փոխարեն ոչ պակաս կարևոր աշխատանքներ չվերցնել հոբելյանական տարում ցուցադրելու համար։ Լեոնարդոն, ի վերջո, իտալացի է։ Ինչո՞ւ նրանք չեն տրամադրում «Մոնա Լիզան»»,- ասել է փոխնախարարը։

Ֆրանսիան բազմիցս հրաժարվել է տրամադրել այդ հայտնի նկարը Իտալիային։ Չորս տարի առաջ Փարիզը պատճառաբանել էր, որ այն ժամանակավոր ցուցադրման համար հանձնելը տեխնիկական առումով մեծ դժվարությունների հետ է կապված։ 

«Մոնա Լիզա» կտավը դա Վինչին նկարել է 1503-1506թ-ին։ Նկարիչն այն ստեղծել է Ֆլորենցիայում, բայց 1516թ-ին նա իր հետ տարել է Ֆրանսիա։ Նկարչի մահից հետո 1519թ-ին նկարը Լեոնարդոյի ժառանգներից ձեռք է բերել Ֆրանսիայի թագավոր Ֆրանցիսկոս Առաջինը։ 18-րդ դարում Ֆրանսիական հեղափոխությունից հետո «Մոնա Լիզան» տեղափովել է Լուվր։