2008 թվականի մարտի 1-ին արտակարգ իրավիճակ մտցնելու վերաբերյալ 0038 հույժ գաղտնի հրամանը պատկանում է ՀՀ պաշտպանության նախարարությանը, և միայն գերատեսչությունն է որոշել, թե ինչ չափով պետք է այն գաղտնազերծվի: Այս մասին լրագրողների հետ զրույցում հայտնել է ՀՀ հատուկ քննչական ծառայության պետ Սասուն Խաչատրյանը՝ ի պատասխան Մարտի 1-ի գործով մեղադրյալ ՀՀ երկրորդ նախագահ Ռոբերտ Քոչարյանի պաշտպանական կողմի այն տեսակետին, թե հրապարակվել են հրամանի՝ կոնտեքստից կտրված հատվածներ, ինչը ձեռնտու է մեղադրող կողմին:

Խաչատրյանը Քոչարյանի պաշտպանական կողմին կոչ է արել, որ վարույթ իրականացնող մարմնին ուղղված նման մեղադրանքներ չշահարկվեն:

«ՀՔԾ-ն որևէ լծակ չունի դատական մարմնի վրա ազդելու համար, չի կարող դատավոր նշանակել կամ ազատել, չի կարող նրանց առաջախաղացման կամ կարգապահական պատասխանատվության ենթարկելու գործընթացում դեր ունենալ», - ասել է Խաչատրյանը՝ անդրադառնալով իր հասցեին հնչող այն մեղադրանքներին, թե ճնշում է գործադրում դատարանի նկատամամբ: